夫妻磨合之道

發噏風 - 夫妻磨合之道

2014年 10月24日 星期五

寫了一篇長長的苦口婆心話給友人的老公：


聰，上次同你傾完計後，我終於比較了解Fiona對你既態度，你認為佢好「怪」既原因。仲有，我唔知你做咗d乜野，Fiona whatapps 我話：「多謝你對我的關心，你講咗之後呀聰對我像多咗一層保護，謝謝你。」

Fiona成日強調叫我唔好講咁多野俾你聽，係因為佢覺得你好煩。佢好清楚亦好明白你有幾緊張佢幾咁愛佢，我相信佢從來無懷疑過，你地既問題，係相處同溝通的方法不協調。你回應佢發牢騷既態度，就好似呀媽叫呀仔飲湯咁：「仔，飲湯啦，湯要熱飲架。」、「仔，好飲湯啦，湯凍咗無益架。」、「仔，仲唔飲，即刻飲咗佢呀。」你果d關心既說話，唔係回應，係煩！叫嘮嘮叨叨！

女人天生本身就係好煩，可以事前驚事中亂事後喊，你叫女人唔好諗咁多野，唔好憂未發生既野係無可能。Fiona性格偏向悲觀內向沉靜，佢缺乏安全感但又事事希望唔駛靠人，佢好有使命感要做個負責任有担戴既人，佢希望另一半能體諒佢付出多過用個口叫佢「唔好担心呢樣個樣，唔好諗咁多，唔好未憂先憂……」。

當你要表達愛意、回應佢牢騷、面對佢沉默、佢情緒不穩定起起伏伏時，你要重新學習，不要用媽媽灌湯式既嘮叨言語，用你自己慣常用的一套安慰話。你用咗咁多年如果work既，Fiona點會覺得你煩？唔肯揭開個內心世界被你入去？

Fiona內斂既性恪唔需要太多言語上既安慰，說話愈簡單愈好，佢需要人地以同理心去明白佢；即係明白、憐憫、同情、体恤、諒解、支持。你只要傾聽事情的經過，不評論處事過程對錯和始未、不置評事件帶來的後果，不加插個人意見同感受。只要做個安靜既聆聽者。

唔係話你失去咗發言權，國家大事經濟股票花邊新聞，總之唔關乎令佢敏感既事情，你都可以發表偉論。兩公婆對咗咁耐，邊d係敏感話題，邊d會觸動Fiona既神經線，你應該比身為朋友的我更清楚，可以刺激到佢既不外乎係佢爹娘哥嫂、你爹娘兄弟姐妹、同至愛既囡囡。工作上既唔開心，對佢來講只係小事一樁，唔會糾纏好耐。

所以你要學習一套新的方式和她溝通：身體語言

e.g. 當佢又黑面時，你要面對面用眼睛直視佢，用手撥一撥她前額既頭髮/ 或摸住佢塊面講︰「邊個激親你呀？我幫你打佢一鑊替你出氣。」然後抱抱佢，保持沉默。/ 或輕輕一句帶過：「你唔開心，我知道。」然後再沉默。/或：「我同你落街行下/ 食糖水」。「來，坐低，我冲杯茶俾你順順氣，一齊睇下電視。」然後繼續沉默，陪住佢。

1. 面對面用眼睛直視：表示重視對方

2.用手撥一撥她前額既頭髮或摸住佢塊面：一個簡單既動作帶來温柔感，每個女人都希望好似少女咁被人汞。

3.「邊個激親你呀？我幫你打佢一鑊替你出氣。」以講笑形式取代呀媽式關心嘮叨。

4. 然後抱抱佢，保持沉默：呢d動作叫身體語言，即係用動作代替言語，這是一種比言語更能撫慰受傷者心靈，正所謂無聲勝有聲。

5. 輕輕一句帶過：「你唔開心，我知道。」：表示你明白對方處境和感受。

6. 「我同你落街行下/ 食糖水」：對於目前狀態膠着，面對一些無可能解决既問題，例如佢爹娘哥嫂既野，係無得解决既，咁不如同佢散下步，但唔一定要吹水。

7. 「來，坐低，我冲杯茶俾你順順氣，一齊睇下電視。」齋陪，同4, 6一樣。

有一點好重要既係，你要睇住佢個自尊心，你要俾佢覺得係家庭入面，夫妻地位對等，千祈唔好講d傷害性既說話，例如：你咁諗就錯啦/你點解咁諗架/ 你咁做無用架/ 我搞掂唔使你理/得啦。

凡事有商有量以示尊重，例如：你想點樣做/ 我想聽你講法/ 你有咩意見/ 我知道了/ 雖然我唔係好了解但我會試下企係你立塲去睇呢件事。

Fiona唔係需要一個大男人式全包宴保護佢的老公，佢需要一個同理心明白佢不多話既聆聽者。

手好攰，唔使打俾我，我就係要講呢d。