粉瘤發炎

洗傷口 - 粉瘤發炎

2016年 8月30日 星期二

背脊有粒大滾友(大粉瘤)好幾年，一直相安無事，以前問過陳醫生，無事無幹可以不理唔洗割。最近佢變得堅硬咗我無為意，慢慢愈來愈痛， 上星期五痛楚難當，落blue cross睇醫生話係粉瘤發炎，下午即睇專科外醫生求醫，個醫生態度奇串，話佢只係負責做手術，診所做同係醫院做收費一樣$5000，佢話個粉瘤而家發緊炎唔割得，叫我好番再來過，佢開咗抗生素俾我食。

老公用佢d 暗瘡常識荼毒我，話幾粒有膿頭既暗瘡生埋一齊姐，只係今次咁啱生係粉友附近。老公見到有三個膿頭熟咗，米幫我揤出來囉。到第二日老公以為我會鬆晒無事，我話唔係噃個背脊仲好痛喎，老公一睜又見有膿頭，於是又幫我擠壓揤佢地出來，今次我痛到係咁嗌「好痛呀！」老公見揤咗兩晚，d 膿水係咁標出來，老公話唔對路：「入面好似仲有好多白色點點野。」叫我聽朝睇醫生，周醫生用針筒幫我抽，都抽不晒。

我走去R字葯房問，哥哥仔介紹咗隻葯膏比我，佢本身含有抗生素，叫我直接搽係皮膚度。跟住我去咗急症室，諗住睇醫生排期割咗個粉瘤等佢以後唔會再發炎，我好耐無去急症啦，以前等四粒鐘而家變咗等咗六粒鐘至有得睇。

醫生一睜即叫我入院，等外科醫生來見我。 入院時已六點，有兩個外科醫生來見我，檢查我的背部話：「抗生素只適合初期發炎時食，但你太嚴重，入面唔知重有幾多個膿頭，要開佢放膿，傷口太高不能半身麻醉要全身麻醉，你五點鐘食咗野，今日應該做唔到等聽日做啦。」我問醫生傷口將會有多大？「傷口有5蚊咁大重唔可以縫針第日要日日洗傷口。」

其實我無諗過咁大件事，又入廠又做手術。 因為方便要做手術，上身已真空着定件紫色長衫，後面開通縛繩的。我被安排走廊盡頭的一間雙人房，入面有獨立厠所。我原本諗住沖涼，於是出去揾淋浴間，發覺呢層樓無女厠無女性沖涼房，只有男的。而且全層既病人都係男性，所以我有奶油相信，我係臨時被插入呢層樓既。

叫個仔拿d 野比我，個衰仔話頭未洗又要做功課，唔肯上來，話工人姐姐來就得啦，新姐姐都未來個醫院，生仔係無用既！乜野都可以唔攞，至緊要攞護膚品，經點算後發覺大鑊啦！眼霜面霜toner綿花都齊晒，但漏咗清潔面霜呀！

呀仔見到我插點滴相至驚訝問：「你究竟發生乜事呀？」佢以為我是一般普通生瘡，所以一d 都唔緊張。半夜十二點正準備瞓覺時，姑娘突然入來話：「而家去做手術。」我就好似隻豬咁俾人抬咗去張運輸枱度送入手術室，然後落咗係手術枱上，我覺得好凍，於是姑娘幫我蓋上一張暖被，何謂「暖被？」係張自動發熱既被，個人即刻暖番晒。

醫生一個麻醉師一個姑娘約有三個，醫生話俾我聽做完手術後會拍醒我，然後至送番我去病房。醫生俾笑氣我聞，叫我一吸一呼，而麻醉師則替我經點滴裝置打入麻醉劑，我感覺到左手有d 冰涼既野進入我身體。然後……瞓着左。手術做完醫生拍醒我，我迷迷糊糊地入番自己個病房，時已半夜兩點，我感覺又暈又痛但麻醉藥未過唔可以飲水食止痛藥。痛下痛下又瞓咗，早上六點，男護士俾包奶同兩個麵包我，我即刻食晒佢地然後啪兩粒止痛藥跟住好平常D甘瞓到兩個鐘。下午三點，個人仲係浮浮地暈暈地，仲要去攞埋藥至出院搭的士回家。

p.s. 補充

2016年 10月14日 星期五

今晚見到Jessica醫生，係咁捉住佢問問題，因為佢都係個急症室當值既醫生。
我問醫生：「點解我可以咁快入院同即刻做手術既？」
「因為你已經灌咗膿，唔放膿繼續發炎會令範圍擴大。」

「係米我皮膚已受到感染，所以唔可以縫針由得佢整成一個窿呀？」
「你唔係割粉瘤，割粉瘤可以縫針，你唔係呢種case，我見過有d 窿好似個拳頭咁大，呢種無辦法靠洗傷口可以好返，要做手術架。」

「咁我係米三個月就好返架啦？」
Jessica笑笑話：「好難講。」

「做完手術後我見到皮膚割口有個圓形圈圈紅色線框，係米好似切蛋糕咁圓形切落去，成塊皮切出來？」
「唔會，以前會介十字，而家都唔用，只係直介一刀然後擘開佢，皮膚係有彈性既。」

「傷口open係啱既，因為唔會再發炎。」

所有醫學上既迷底已解開晒啦！當我話俾Jessica聽，診所姑娘叫我地唔好飲魚湯，會形成一浸白色野時，佢都好驚奇啊！


出院紙咁寫👇🏻

Surgical condition
手術條件

Skin abscess of back of trunk
軀幹背部皮膚膿腫

Incision and drainage of skin abscess
切開皮膚膿腫引流