崩潰人生

康復之路 - 崩潰人生

2016年 12月21日 星期三

2004年，37歲，人生第一次的生命爆破，正式踏上輔導治癒之路。

2009年，42歲，因哥哥突然離世，人生第二次再度生命爆破，這一次爆到崩潰了，要見精神科醫生、心理臨床醫生和催眠治療三管齊下。

今年，2016年，49歲盡頭，人生經歷第三次崩潰。成因不再是圍繞着摰親好友，是自身生命的本質，人性內在的本相，徹徹底底地裸露無法掩飾無法躲避。因為上帝要你看清楚你是受造之物，你是罪人也是義人，得重新領受檢視學習「救恩」是如何的寶貴是怎麼的一回事。

上星期五我打算如常地返崇拜，但愈接近放工時間我就愈不安害怕，我手震哭泣好怕返崇拜，我無法敬拜羞愧面對神。做了信仰老油條多年第一次有這麼激烈的反應，我告訴牧師：「我返唔到崇拜呀！」久違了的「身心症」回來找我，我已很久沒有頭痛了！吃鎮靜症後的反應也違了常規亂晒龍。牧師說因為今次的事太刺激我了。

我不明白上帝為何要我感受耶穌被掛上木頭的情境，感受那只屬天不屬地的愛，沒有任何文字可以描述或形象化那種感覺，只有單純地深深地體會和經驗。但這份感覺太震撼令我無法承受招架，結果我不斷在抑鬱。

我清楚知道今次的經歷，是平信徒沒法理解，即使他們有多愛我，牧師亦坦言不是每位信徒會有此經驗。因此地上只有一個人，既是一位牧者又是心理治療師可以完完全全地理解我的心理變化不用我多費唇舌，又能以聖經為本來教導我，帶我走出黑暗。聖經說，我們必經苦難，但神的恩典夠我用總會給我們開路。廖牧就是我的幫助我的後盾。

我一見到牧師眼淚就狂飆，就如見到拯救者一樣。我表示上次那感覺太強烈，「你只能減輕敏感度。」牧師叫我回想作善時那份喜悅，留意身體那部份有感覺，但我做不到。「聖誕節我唔開心，有乜野好慶祝？耶穌出世就係要去死！」，「我唔明點解上帝要我做個情感咁敏感既人，但我又諗如果我連呢個特質都無埋，我會成為個乜野人？」，牧師答：「米係一個木頭人囉。」

「你係度審判緊你自己。」
「你想消失，我上次已經話你行緊猶大既路，佢見到自己陰暗面後，他選擇咗自殺放棄咗上帝。」
「你接受唔到自己，就係不信仲大罪。」
「耶穌為你死時就已經知道你恨你呀媽。」
「我地唔係承認福音，係接受福音，你而家拒絕上帝既救恩，係對上帝最大既侮辱，先至係最大既罪。即係皇帝要賜獎賞俾你，但你拒絕喎，結果點呀殺頭囉。」
「我地本質係罪人但同時係耶穌基督裡被稱為義人，係呢個世界上無人能達到上帝既標準，任何人都無可能，我讀羅馬書八章俾你聽。」
「領聖餐時我唔係隨口噏，點解我擘餅話耶穌為你擘開身體係有原因，因為耶穌已經清淨你既罪可以領聖餐，你記唔記得你曾經問過我，你覺得自己有罪唔配領聖餐呀？呢d 米係你以前返教會荼毒返來既野囉！其實你已經收晒好多錯既信訊只係你自己唔知。而家d教會洗禮分三級制架，敬虔既先至就有得洗。」
「守律法唔能夠使人得救，記唔記得聖經入面有個話自己已經遵行晒律法，問耶穌點樣至可以得救？耶穌回答佢叫佢分晒d 財產出來俾窮人，結果點呀？佢米走頭囉。」
「聖靈同邪靈最大既分別係，聖靈唔會管束你，但邪靈就會騎劫你，你而家就係俾佢騎刧緊。」
「保羅寫哥林多前書時已經好老，保羅喎！但佢話自己係罪人之中既罪魁。仲有大衞仲衰，搶人老婆又殺人。」
「你做過既善事上帝係會court既。」
「你快樂，上帝都會快樂，佢都想見到你幸福。」

我開始平靜下來：「我攬住老公喊話好辛苦，但老公唔會明。」，「成長係要付出眼淚。」牧師：「係架。」，「我既洋蔥剝到見底未呀？」，「唔知，只有上帝至知。」，「幫我做個催眠好嗎？我想睇睇內在既綺薇想法。」，牧師拒絕：「唔好，你會承受唔到，我反而想同你做聖經正面既說話，因為你傾向揾負面既來睇。」，「係因為哥哥件事，個時我頂唔順，每日睇三本聖經睜到半夜兩點，靠神既說話頂住。個 d "賞賜是耶和華收取的也是耶和華；你在母胎中就已經決定咗你係生命册上既歲數；傳道書講既虚空一切也是虚空；仲有約伯既苦難……呢 d 都入晒心。」，「啊…明白啦。」，我又開始哭：「仲有申命記入面我唔記得邊一章邊一節，個年我42歲，"40年來，你的衣服沒有破，你的腳也沒有腫……"」。「呀哥知道我成長一定好開心」，牧師堅定地回答：「一定。」。「你為我祈禱好嗎？不過我又會大喊。」，牧師也搖搖頭表示不祈禱。「我可以攬下你嗎？」我說可以。我像受了傷的女兒伏在爸爸的懷中，感覺很安全又再次使我哭泣起來。，「好辛苦呀，我由30幾歲喊到50歲。」，「咁米好囉，有 d 人淚管閉塞想喊都喊唔出。」，「我成日喊係唔會閉塞架！」，「好在有你地，無咗你地我唔知點算，我行唔到落去。我知道自己好幸福，而家屋企好和諧，老公開心呀仔又開心。」，「係囉，努力有收成。」。我知道牧師正在默默地用另一種方式為我禱告。他不肯收我費用，因為今日他是以牧者的身份去餵養我這隻小羊。

親愛的廖牧，謝謝你！感恩有你同行與陪伴，感謝神！