洗傷口 - (八)

洗傷口 - (八)

2016年 9月26日 星期一

診所共有三個專負責洗傷口的姑娘，我暗地裡替她們改了花名，靚靚、温柔和粗魯。

頭兩個都是温柔的，捽下停下，聽見你嗌會停一停問下你，「點呀？好痛呀？」，「頂唔順可以停下，唔使一次過架喎。」或者：「無晒聲係米暈咗呀？」咁我可以抖幾秒嘛。但粗魯就不停咁捽，我不停重複咁嗌：「好痛呀！」你有你叫佢有佢捽話之你死，真係好鬼粗魯又捽得夠狠，食咗止痛藥等如無食過。

睇番佢捽完我之後果張相，果然係紅當當一片，唔好話無晒d 黄色分泌物，連側邊白色既新肉都捽走埋，乾淨得遠遠拋離呀靚靚同温柔。

結果我痛咗兩日，痛到連工都唔想返，行路速度似足呀婆。