2016年 9月5日 星期一
戆直老公與蠢鈍老婆
尋晚照靚靚姑娘吩咐揾老公幫手洗傷口，老公話：「傷口好靚喎變咗白色好似棉花咁，出緊肉啦好小事啫，傷口深度得2mm至3mm左右。」
今日係第二位姑娘(溫柔型)接手同我洗，我照上一位靚靚姑娘既吩咐俾番尋晚洗完傷口後既照片俾佢睇，溫柔姑娘睇完呆一呆：「你做乜唔拎走舊棉花呀？」原來尋晚洗完等如無洗，老公用花灑唔係噴緊傷口，係噴住舊「棉花」。我問姑娘究竟傷口有幾深？原來有一個cm咁深。舊棉花係止血用來填滿個洞。我覺得好好笑囉！「棉花」係舊新肉，傷口2mm變咗1cm。
我趴起床度洗，溫柔姑娘繼續同我剪走洞內側邊深色既汚糟皮，我不吭一聲做催眠盡量放鬆肌肉減輕痛楚，姑娘：「無聲既，係米暈咗呀？」我擰擰頭。「忍唔忍到呀？可以唔使一次過起架，可以分多次做架。」「忍到，繼續。」
此時，尋日幫我洗傷口既靚靚姑娘入來，認到我個傷口。「咦！佢瞓起度認唔出係佢添，佢尋日好叻呀，趴係張凳度洗咋！」
溫柔姑娘問靚靚姑娘，點解成個傷口係黑色既，有經驗既靚靚答：「應該係佢當時bleeding得緊要，所以用咗好Xxxx(英文名唔識聽，應該係d止血既物質)。」「尋日都係我唔好，無講清楚叫佢拎走舊止血棉，佢老公又唔識睇。」
溫柔姑娘已停咗手，但靚靚姑娘卻按捺不住：「我忍唔到呀要起晒佢至得。」問我：「你仲忍唔忍到痛呀？」我點點頭表示可以。「今日仲有你自身既分泌物，一定要鉗晒佢出來，咁就會好好多架啦。」
靚靚姑娘同今日溫柔姑娘講：「佢真係好叻好忍得痛，三日咁短時間就可以揭開晒塊黑色野。」靚靚邊講邊不停咁捽我個窿窿。
靚靚姑娘教我：「去藥房買消過毒既紗布同棉花棒，用花灑噴住傷口十五分鐘同時用棉花棒捽個傷口，要特別捽走圓洞圍邊個度既汚糟野。噴完後用凍滾水再沖洗多次，然後用我俾你既葯膏，唧兩粒好似黄豆咁大咗右，大細用你手指尾塊指甲咁大度啦，薄薄地搽係個窿既平面度，側面就麻煩d，因為凹凸不平既關係，你要用手掹開佢搽藥膏，務求要搽到每一忽。之後就輪到你靠自己每日洗傷口，唔洗日日來診所，一星期來兩日就得架啦。
至於食野方面，千祈唔好飲魚湯尤其係生魚湯，有病人飲過魚湯返來後，傷口會產生一浸白色野。」「姑娘，我飲過雞湯同肉湯喎！」「雞湯唔好啦肉湯無所謂。盡量食多d生果，木瓜橙奇異果等。」
沒有留言:
張貼留言